Rabu, 06 Desember 2017

"Pencuri, Cerita Kencing Subuh"

Cuka minyak, Beta pung mangantok ilang memang,
Beta dudu tanganga angin didepan rumah, kasi mati lampu teras sambil stom linting tambako sek. Su jam Jam 1.30 malam... ada dua nyong lewat deng motor metik hitam ko singga kincing di gang sebelah jalan yang remang-remang, kayaknya su kena air kiti kata ko dong dua bacarita deng suara tape'e besar, padahal ini su tenga malam. Sambil spoit, dong dua ada bahas topik yang bikin Beta tahedek...
Be su keker baebae ma son kenal dong sapa. Nyong A tinggi sekitar 170cm, badan besar, buncit, rambut selak, testa mangkilat, suaranya sedikit melambai. Nyong B tinggi sekitar 160cm, sonde talalu gemuk, rambut keriting, suara cempreng...
Nyong B: we sekarang ni kitong su susah bedakan Lsm deng partai politik...
Nyong A: bukan cuma itu hang, sekarang susah bedakan rumah ibadah deng sekertariat partai...
Nyong B: ko dulu dong datang deng jeket ungu, kuning, biru, merah, hijau ke malekat bantu orang sana sini, ju ternyata ujung-ujung dong main politik ko jadi dewan na, main pilkada na...
Nyong A: ko lu kenapa son maju dewan tempo hari?
Nyong B: ko b kurang kerja mangkali, maen ko son jadi na gila, kalo jadi na pancuri...
Nyong A: itu karna dong pung iman son kuat, kalo kuat sonde mungkin lah...
Nyong B: ho ko habis itu dong mulai hitung dong doi yang su keluar, ko ke hebat-hebat ada perjuangkan ini itu, ma nanti dong keliling ame jatah reman persen proyek. Lu cek dong pung bini ana dong sama ke toko mas berjalan, pake oto dinas pi pasar na, pi ceke mabok na...
Nyong A: belum lai pake pi sembayang ampun dosa habis itu pencuri lai... dasar su jahat mo bikin muka malekat ju tetap setan hang...
Nyong B: ko dong pung gaji dong ada ator ko kas naek hang...
Nyong A: eh ko lu ada keker pi situ ju?
Nyong B: lu ni memang sonde gaul e, baca berita ko jang pi pancing ikan sa... belum lai yang di fb hobi live, pi berak ju live...
Nyong A: eh, kitong jalan su ko? B liat ada bayangan apa ko diujung jalan...
Nyong B: Ho, mari su te sama ke ada parampuan rambut panjang baju putih...
Nyong A: woi, lu su mabok ma liat buntiana ju....
Dong star motor ko jalan....
B asli tahedek, rupanya semua orang ada pantau e....

NHN, 09102017

0 komentar:

Posting Komentar

"Silahkan Tulis Yang Ada dalam Kepala Anda"