PESTA PORA DRAKULA POLITIK

(sebuah puisi permintaan seseorang yang tak mau disebut namanya)
Oleh: Vincentcius Jeskial Boekan

Kota Kupang...
Ibukota Provinsi Nusa Tenggara Timur
Orang dong memberi julukan macam-macam
Dari yang bae sampe sonde bae

Kota Kasih
Kota Bougenvile
Kota Terkorup
Kota Bakalai

Sekarang ini
Foto-foto para Balon Walikota/Wakil Walikota ponu bekin sesak Kota Kupang
Semua senyum abis, sonde ada yang muka asam
Kotong katawa sa, dong buang-buang doi percuma

Pesta demokrasi su dekat
Su satu taon para Balon dong bakalai
Semua kasi tunju dia pung benar
Kotong bingung apakah yang salah itu harus jadi benar, juga sebaliknya

Para Balon baru'i sonde abis-abis
Rakyat susah mati pung, hati tairis-iris karna lapar dan
sonde bisa kasi sekola anak deng bae
Semua sonde toe, kasi kaluar uang Miliaran rupia untuk beli kursi parte
Tau itu doi dong ame darimana sa

Yang pung doi dong
Atao yang pegang doi di kantor dong
Ator uang untuk pesta pora
Ada ju yang cabut kasi kaluar dia pung harta dong, jual barang, pinjam doi di Bank

Pesta pora akan tamba rame
Drakula-drakula keliling kampung
Mau isap darah ko dapat suara dan berkuasa
Kotong rakyat selalu jadi korban, pemimpin lama dan baru sama sa, bae saat kampanye, su berkuasa su laen lai...kotong pung leher balobang, dara abis memang.